生於天橋底

有嗜好的人，等於有死穴；若果你的嗜好是人人都知道，就如公開了死穴讓人攻擊。明明對自己說過，書櫃裡還有太多書未看完，小桌椅下亦有一大疊《信報》未清理，記住、記住、記住，千祈、千祈、千祈，暫時唔好再買書住。

唉，人總是三心兩意嫌未夠多，戀字的人自然愛買書，買來唔睇就當豪裝的一部分，所以看到黃偉文的《生於天橋底》，嘩，細細舊成120蚊，又唔係一夜夫妻，使唔使咁貴呀？不過咁，包裝實在靚得出奇，以香港書來說，睇得出是肯放本錢設計和印刷，加上一向係佢專欄《Buy me a Sunday》的唔多忠實粉絲，今舖走唔甩咯。我諗，睇到呢舊書的心態，大概同黃偉文睇到心儀的時裝一樣，招咗，即係中咗招呀。咁樣諗法，當堂順晒氣。

或者大家會奇怪，點解書的量詞係一舊舊，而唔係一本本，我冇用錯詞，真係一舊舊，因為佢係用盒裝住三本小書，據講呢種騎呢size就叫做袋裝書，比80年代《小男人周記》形式仲要細本，pack埋一齊就係一舊舊。放在書局裡是眼看手勿動，唔能夠翻閱，若果得個殼，裡面係黑白或者得文字，就真係虛有其表咯。不過好彩，攤出來的封面真係靚到痺，查實封底都好靚，個盒又好靚，總之靚靚靚。

打開裏面，嘩，有彩圖呀！香港唔知幾耐冇出過有彩圖的書啦，唔信即管去書局搵搵，除咗雜誌社o個啲吃喝玩樂保證有鴨仔團成員會買的旅遊書，或者樓盤售樓書，大部份作家的書都係雙色或黑白，上次黃偉文本《俗》，都只係純文字咋。

不過咁，人心冇厭足，若果推出非袋裝版，字體大o的，圖片大o的，box set 巨型o的，相信我願意俾多o的錢買多套！希望有心人繼續出多o的靚書，我咁願被劫呀！